Fréttir

KRÍUPARTÝ
12. janúar 2016

KRÍUPARTÝ

Dúndurpartý....nú verður reynt aftur! Eins of flestum sem fylgjast með skemmtanalífinu á Suðurlandi neyddust vertarnir á Kríunni Sveitakrá að fresta auglýstu Kvennapartýi sem vera átti 4 des sl. vegna veðurofsa. Reyndar mættu sex konur sem börðust með harðfylgi gegnum snjó og byl og skemmtu sér konunglega þrátt fyrir fámennið. Næsta föstudagskvöld verður svo blásið til veislu annað sinn á Kríunni þar sem opið er fyrir alla kellingar og kalla. Húsið opnar kl 19:30 og boðið verður uppá heitt Fullorðins-Glögg ...já Glögg þó jólin séu búin!! María Lovísa fatahönnuður verður með stórglæsilega tískusýningu þar sem hún sýnir sína nýjustu hönnun....flott dress og kjólar fyrir þorrablótin. Veglegt happadrætti þar sem m.a. er líkamsræktarkort, út að borða. og spænskunámskeið í vinning. Lifandi tónlist á eftir...smá leyndó hverjir stíga á stokk Nýir barþjónar úr borginni sem ekki hafa sést áður, blanda flotta kokteila fyrir utan að vera augnayndi...... Kynnir verður heimskonan og lífskúnstnerinn Bryndís Schram. Þennan viðburð er vert að mæta á og um leið halda uppá nýbyrjað 10 starfsár Kríunnar

Hesthúsið
30. desember 2015

Hesthúsið

Það var á haustdögum 2004 þegar vertarnir á Kríunni tóku sig upp og fluttu úr Garðabænum í Glóru í Hraungerðishreppi. Það var ekki meiningin í upphafi að flytja heldur var verið að leita eftir beitarstykki fyrir hrossin. Þegar frúin á Kríumýri mætti til að skoða fjósið í Glóru og stykkið sem því fylgdi, gerðust hlutirnir hratt, og um sólarhring seinna var komið staðfest tilboð og síðan liðu nokkrir dagar þar til kaupin voru gerð og ákvörðun tekin um að byggja hús á staðnum. Síðan hefur mikið vatn runnið til sjávar og tíminn liðið hratt. Nú þegar 12. Árið er að hefjast er enn verið að bæta aðstöðuna eftir efnum og aðstæðum. Í vetur var hafist handa við að reisa reiðgerði með léttu þaki sem við köllum reiðhof en samskonar reiðgerði er að finna í Almannadal við Geitháls og einnig að Bessatöðum við Hvammstanga. Það hefur aðeins háð aðstöðunni í hesthúsi Kríunnar að hafa ekki inni reiðaðstöðu í svartasta skammdeginu þegar veður geta verið válynd. Þegar skiptast á frosthörkur og hlákukaflar getur hreinlega verið erfitt að hleypa folöldum og ójárnuðum tryppum út í gerði vegan klaka. Þá verður gott að hafa mikið rými til að láta folöld og tryppi hlaupa. Reynsla Jóhanns Magnússonar á Bessastöðum af reiðhofinu til tamningu á ungum tryppum er afar góð. Í hesthúsi Kríunnar er leigðar út stíur til hestamanna eða tamningamanns, allt að 20 stíur og pláss fyrir um 20 folöld. Gleðilegt nýtt ár og megi 2016 verða ykkur öllum gæfuríkt. Hörður og María

Reiðhof
19. nóvember 2015

Reiðhof

Í hesthúsi Kríunnar hafa verið leigðar út stíur fyrir folöld, graðhesta og reiðhesta. Í húsinu eru 26 einhesta stíur og 4 tveggjahesta stíur og hafa þær oftast verið notaðar undir folöld. Fóðurgangurinn er langur og breiður og oft nýst ágætlega til að taka fyrsta sporin á frumtamningar tryppum. Á vetrum þegar illa viðrar hefur oft ekki verið hægt að ríða út svo dögum skiptir. Til að leigupláss nýtist betur réðumst við í að reisa reiðgerði með léttu þaki svokallað Reiðhof svo það verði fýsilegur kostur fyrir hestamenn að leigja pláss í hesthúsi Kríunnar.

Fússball
22. september 2014

Fússball

Hér á árum áður var hið vinsæla borðspil ´´Fússball´´ spilað í öllum félagsheimilum. Nú hafa vertarnir á Kríunni sett upp mennskan Fússball í fullri stærð 10x4 metrar þar sem 5 leikmenn eru í hvoru liði. Á meðan vertinn eldar lambið á grillinu geta hópar tekið Fússballleik þar til steikin er klár

Ýmsir hópar heimsækja Kríuna
25. júní 2014

Ýmsir hópar heimsækja Kríuna

Þetta vorið var óvenju mikið af vinnustaðahópum sem sóttu Kríuna heim. Komu hóparnir víða að, meðal annars af Suðurnesjum, Kópavogi og Reykjavík. All flestir hóparnir stoppuðu í mat og drykk og sumir hóparnir slógu upp balli eftir matinn með þeim feðgum Labba og Bassa og skemmtu sér langt fram eftir kvöldi.

Þolreið kríunnar
01. maí 2014

Þolreið kríunnar

Þann 10 maí sl. var Þolreið Kríunnar og Dýralæknaþjónustu Suðurlands haldin í fyrsta sinn. Um er að ræða létta og skemmtilega keppni sem var að fyrirmynd þeirra áður hafa staðið að þolreiðarkeppni hér á landi.